Geboorte van Moshè. Hy vlug na Mìdian.

EXO 2:1 : EN 'n man uit die huis van Levi het gegaan en 'n dogter van Levi geneem.

EXO 2:2 : En die vrou het swanger geword en 'n seun gebaar. En toe sy sien dat hy suiwer was, het sy hom drie mane [se dae] weggesteek. [Openbaring 12:2]

EXO 2:3 : Maar toe sy hom nie langer verborge kon hou nie, het sy vir hom 'n Ark van biesies geneem en haar met lymgrond en pik bestryk; en sy het die seuntjie in haar neergelê en haar in die riete aan die kant van die rivier gesit.

EXO 2:4 : En sy suster het op 'n afstand gaan staan om te wete te kom wat met hom sou gebeur.

EXO 2:5 : En Farao se dogter het na die Nyl afgegaan om 'n bad te neem, terwyl haar diensmeisies aan die kant van die Nyl heen en weer geloop het. Toe sien sy die Ark tussen die riete en stuur haar slavin en laat dit haal.

EXO 2:6 : Nadat sy haar oopgemaak het, sien sy die kind, en kyk, dit was 'n seuntjie wat huil! En sy het hom jammer gekry en gesê: Dit is een van die kinders van die Hebreërs.

EXO 2:7 : Toe sê sy suster aan die dogter van Farao: Sal ek vir u 'n pleegmoeder uit die Hebreeuse vroue gaan roep, dat sy vir u die seuntjie kan soog?

EXO 2:8 : En Farao se dogter antwoord haar: Ja. En die jongmeisie het geloop en die seuntjie se moeder geroep.

EXO 2:9 : Daarop sê Farao se dogter vir haar: Neem hierdie seuntjie en soog hom vir my, en ek sal jou loon gee. En die vrou het die seuntjie geneem en hom gesoog.

EXO 2:10 : En toe die seuntjie groot geword het, bring sy hom na Farao se dogter; en hy het haar seun geword. En sy het hom Moshè genoem en gesê: Ek het hom mos uit die water getrek.

EXO 2:11 : En in dié dae toe Moshè al groot was, het hy na sy broers uitgegaan en hulle harde arbeid aangesien. En hy het gesien hoe 'n Egiptiese man 'n Hebreeuse man, een uit sy broers, slaan.

EXO 2:12 : En hy het hierheen en daarheen gekyk, en toe hy sien dat daar niemand was nie, het hy die Egiptenaar doodgeslaan en hom in die sand begrawe.

EXO 2:13 : Die volgende dag het hy weer uitgegaan, en daar was twee Hebreeuse manne wat met mekaar veg. Hy vra toe vir die boosdoener: Waarom slaan jy jou naaste?

EXO 2:14 : En hy antwoord: Wie het jou as owerste en regter oor ons aangestel? Dink jy om my dood te slaan soos jy die Egiptenaar omgebring het? En Moshè het gevrees en gesê: Waarlik, die saak het bekend geword!

EXO 2:15 : En toe Farao van dié saak hoor, het hy probeer om Moshè dood te maak. Maar Moshè het van Farao af weggevlug en in die Aarde van Mídian gaan woon. En hy het by 'n put gesit.

EXO 2:16 : En die priester van Mídian het sewe dogters gehad: dié het gekom om te put en die drinkbakke vol te maak om hulle vader se kleinvee te laat drink.

EXO 2:17 : Maar die veewagters het gekom en hulle weggedrywe. Toe staan Moshè op en help hulle en laat hulle vee drink.

EXO 2:18 : En toe hulle by hul vader Rehuel kom, sê hy: Waarom kom julle vandag so gou?

EXO 2:19 : En hulle antwoord: 'n Egiptiese man het ons uit die hand van die veewagters verlos; en hy het ook volop vir ons geput en die vee laat drink.

EXO 2:20 : Daarop sê hy vir sy dogters: En waar is hy? Waarom het julle die man dan daar laat staan? Roep hom, dat hy brood kan eet.

EXO 2:21 : En Moshè het ingewillig om by die man te bly, en hy het aan Moshè sy dogter Sippóra gegee.

EXO 2:22 : En toe sy 'n seun baar, het hy hom Gersom genoem. Want hy het gesê: Ek het 'n besoeker in 'n vreemde deel van die Aarde geword.

EXO 2:23 : En in daardie lang tyd het die koning van Egipte gesterwe. En die kinders van JisraEl het gesug en geweeklaag vanweë die slawerny. En hulle geroep om hulp oor hulle slawerny het opgeklim tot die Elohim.

EXO 2:24 : En Elohim het hulle gekerm gehoor, en Elohim het gedink aan Sy Verbond met Abraham, met Isak en met Jakob.

EXO 2:25 : En Elohim het die kinders van JisraEl aangesien, en Elohim het kennis geneem.

This website was powered by Ewisoft Website Builder.