WVS 15:1 : MAAR U, onse Elohim, is suiwer en getrou; U is vol Medelye en U bestuur die heelal met Ontferming.

WVS 15:2 : Want wanneer ons oortree, is ons nog U eiendom en erken ons U Mag; maar ons sal nie oortree nie, omdat ons weet dat ons as U besit beskou word.

WVS 15:3 : Volkome Geregtigheid is dit om U te ken; die wortel van die onsterflikheid is om U Mag te besef.

WVS 15:4 : Geen bedrieglike versinsel van sterflinge het ons laat afdwaal nie, en ook nie die nuttelose inspanning van skilders nie,

WVS 15:5 : waarvan die sien by die dwase begeerte opwek, sodat verlang word na die lewelose gestalte van 'n dooie afbeelding.

WVS 15:6 : Minnaars van besoedeling en werd om op dergelike dinge te hoop, is die wat dit maak en bemin en vereer!

WVS 15:7 : 'n Pottebakker byvoorbeeld, knie met inspanning die sagte klei en boetseer allerlei dinge vir ons gebruik; sonder onderskeid maak hy uit dieselfde klei die vaatwerk wat vir 'n eersame gebruik dienstig is, en die teendeel; maar of dit nou vir die een of die ander doel gebruik word, dit beslis die pottebakker.

WVS 15:8 : Maar met besoedelde inspanning boetseer hy uit dieselfde klei 'n ydele idool, terwyl hy kort tevore self uit die Aarde gemaak is en oor 'n kort tydjie weer daarheen teruggaan waaruit hy geneem is, wanneer die siel wat hy geleen het, weer opgeëis word.

WVS 15:9 : Hy vergeet dat hy ooit sal beswyk en dat sy lewensduur kort is; tog wedywer hy met goud- en silwersmede en boots hy die bronswerkers na; hy ag dit selfs 'n eer dat hy namaaksels kan boetseer.

WVS 15:10 : Sy hart is as, en sy hoop is nietiger as Aarde, en sy lewe verdien minder agting as die klei,

WVS 15:11 : want hy misken Diegene wat hom boetseer het en in hom 'n werksame gees ingeblaas het, en wat 'n lewende siel in hom geplant het.

WVS 15:12 : Maar hulle laat dit voorkom dat ons lewe 'n spel is, en dat die bestaan 'n winsgewende volksfees is, want hulle meen dat uit alles wins gemaak moet word, selfs uit besoedeling.

WVS 15:13 : Tog weet hy beter as almal dat hy oortree, wanneer hy uit die stof van die Aarde breekbare vate en afbeeldings vervaardig.

WVS 15:14 : Baie dwaas is hulle almal en ellendiger as 'n kind, daardie vyande van U volk en sy verdrukkers.

WVS 15:15 : Want hulle beskou al die huisidole van die nasies as gode, ofskoon hulle nie hulle oë kan gebruik om te sien nie, hulle neuse nie om lug in te asem nie, hulle ore nie om te hoor nie, die vingers van hulle hande nie om te voel nie, en hulle voete is onbruikbaar om te loop.

WVS 15:16 : Want hulle is gemaak deur 'n adamiet; iemand wat sy eie siel slegs geleen het, het hulle gevorm. En nie een adamiet kan 'n god maak wat selfs aan homself gelyk is nie.

WVS 15:17 : Omdat hy sterflik is, maak hy met misdadige hande slegs 'n lewelose ding: self is hy dus meer as die dinge wat hy vereer, omdat hy self leef en daardie dinge nie.

WVS 15:18 : Hulle vereer ook die afskuwelikste wesens, wat vanweë hulle domheid minder geag word as die ander;

WVS 15:19 : en wat nie so is dat 'n mens daarvan hou nie, soos dit by die sien van diere wel gebeur; maar dit is wesens waaraan Elohim se lof en Sy seën verbygaan.

This website was powered by Ewisoft Website Builder.